Preziai tuts
Cun grond plascher ed engrazieivladad astgein nus envidar vus all’avertura dil niev PRIMA a Surrein. L’avertura ha liug la sonda, ils 15 da november 2025. Las portas ein aviartas igl entir di e nus envidein in e scadin cordialmein da far ina viseta en stizun. Denter las 14.00 e las 16.00 uras offerin in pign apero per far ensemen cun vus in viva sin nossa stizun nova. Sin giavisch mussein ed informein nus vus en detagl sur dil sistem hibrid. Nus selegrein d’astgar presentar a vus quei concept niev e da festivar ensemen cun vus quei pass impurtont el futur da nossa stizun dil vitg.
uras d’avertura
Il niev PRIMA hibrid ei aviarts sco suonda:
-
gliendisdis entochen sonda: 06.00 – 22.00 uras
-
dumengia: 08.00 – 20.00 uras
La partiziun d’alcohol e tubac ei mintgamai serrada naven dallas 20.00 uras.
access e pagament
L’entrada ella stizun nova ei pusseivla cun ina carta da banca. La partiziun d’alcohol e tubac sesarva cun in document d’identitad ufficial (carta d’identitad ni bigliet dad ir cun auto). Il pagament vegn fatgs cun carta ni cun Twint. Daners en bar vegnan buca pri encunter duront il temps senza persunal.
sustegn davart dil persunal
Il persunal dalla stizun ei mintgamai presents ils avonmiezdis naven da gliendisdis entochen sonda e suplementar sonda naven dallas 14.00 entochen las 16.00 uras. Duront quei temps eis ei pusseivel da sevolver per damondas ni explicaziuns tiel persunal. Duront quei temps san ins entrar en stizun senza carta da banca.
Sch’ei basegna ei la cassa occupada il gliendisdis entochen sonda las 08.00 – 11.00 uras e sonda las 14.00 – 16.00 uras cun persunal. Duront quellas uras eis ei pusseivel da pagar la rauba cun daners.
Suenter in cert temps d’emprova vegnan il funcziunament ed ils process giudicai danovamein. Ei sa aschia esser, ch’ei dat pintgas midadas tiel temps da presenza dil persunal, quei per vinavon saver garantir in menaschi efficient e tenor vos basegns.
start communabel
Nus essan cunscients ch’ei drova all’entschatta ed entochen ch’il sistem hibrid funcziunescha bia engaschi, pazienzia e capientscha da tuttas varts. Ei vegn segir a dar damondas e forsa era malcapientschas, quei ch’ei denton tut normal. Cun sustegn e respect vicendeivel vegnin nus a dumignar cun success quell’emprem’etappa e da mantener il PRIMA sco impurtont liug da sentupada per nies vitg.
Nus selegrein sin vossa viseta e sin ina buna partenza cun quella nova e moderna stizun per nies vitg. Medemamein engraziein a vus gia ordavon per vossa capientscha e per vies agid da vinavon mantener la stizun el vitg, che garantescha il provediment dil mintgadi ed ei ultra da quei in impurtont liug da sentupada.
Cordials salids
La suprastonza dalla Societad cooperativa da consum Surrein-Rabius
